Vuoigatvuođaministeriija váldá atnui sámegielat logo

OM_saa_RGB

Vuoigatvuođaministeriija lea otne váldán atnui sámegielat logo. Logos lea vuoigatvuođaministeriija namma buot golmma Suomas hállon sámegielain, davvisámegillii, anárašgillii ja nuortalašgillii. Vuoigatvuođaministeriija geavaha logo divššodettiin áššiid sámeguovllus ja sámegielat dieđihanmateriálain.

Suoma sámediggi ordne ovttas Norgga sámedikkiin sámegiela vahku 21.-27.10.2019 Suomas ja Norggas. Vuoigatvuođaministeriija háliida gulahallamisttis buktit ovdan sámi gielaid.

Virgeoapmahaččat galget sámi giellalága mielde álbmogii čujuhuvvon dieđiheamis geavahit maiddái sámegiela. Earret eará almmuhusat ja dieđáhusat galget addojuvvot sámegillii dalle, go dat gusket eanaš sápmelaččaid dahje dain lea earenoamáš stuorra mearkkašupmi justa sápmelaččaide.