Pekka Aikio Ruonáid euroválgaevttohassan

Aikio+Pekka

Ruonát leat nammadan iežaset euroválgaevttohassan árvvusadnojuvvon sámepolitihkkára, Suoma sámedikki guhkesáigásaš ságadoalli, Pekka Aikio. Ruonáid euroválgalistu lea gárvvis, go Aikio, 69, lea nammaduvvon.

– Eurohpá uniovnnas hupmet gal olu birasgažaldagain, muhto máŋgii deattuhusat leat boastut. Eandalitge dávviguovllu áššiin lea olu eahpesihkarvuohta ja danin hálidan bajidit ságastallamii namalassii dan lundui ja kultuvrii gullevaš gažaldagaid, vuođušta Aikio evttohasvuođas.

– Illudan das, ahte Pekka Aikio hálidii leat min evttohas dáin válggain. Anán árvvus su guhkesáigásaš ja viiddis riikkaidgaskasaš dási áššedovdámuša ovdamearkka dihte eamiálbmogiid ILO-soahpamuša ráđđehallamiin, Árktalaš ráđi barggus ja suvdilis ovdáneami ovddideamis, dadjá Ruonáid ságadoalli Ville Niinistö.

– Dáinna ebmos evttohasjoavkkuin lea buorre vuolgit euroválggaide ja unnimustá seamma buori bohtosa guvlui go maŋimus gearddege: guokte ruoná meppa ja 12,4 proseantta guottihus.

Aikio doaimmai Sámedikki ságadoallin jagiid 1996 -2007. Son lea Oulu universiteahta gudnedoavttir ja son lea bargan biologan ja boazodutkin.

– Eallima bajásdoallan eananspáppas, ráinnas eanan, áibmu ja čáhci, olmmošvuoigatvuođat ja kultuvra – buot dát čatnasit oktii. Boazodoallu lea das buorre ovdamearka: árbevirolaš, johtti boazodoallu lea dehálaš ja lunddolaš guohtuneatnamiid geavahanvuohki. Ferte ipmirdit dávviguovllu earenomáš iešvuođaid – dat ii oaččo leat dušše beare ruvkedoaimmaid ávnnasvuorká, muittuha Aikio.

Ruonát vulget euroválggaide dievas 20 evttohasa listtuin. Bellodat bargá juo goalmmát geardde oktasaš eurohpálaš kampánnjá Eurohpá Ruoná bellodahkan.

– Ruonát leat Eurohpás oktilaš politihkálaš lihkadus. Go jienasta ruonáid, de diehtá maid oažžu. Mii hálidit vástidit olbmuid fuolaide boahttevuođas. Eurohpá dárbbaša dál sin, geain lea miella divvut iige cuvket. Eurohpá dárbbaša doaivvu ja molsaeavttuid dasa, man guvlui mii hálidit boahttevuođa doalvut, dadjá Niinistö.

Pekka Aikio ja euroválgaevttohasat Oras Tynkkynen, Maria Ohisalo ja Satu Haapanen leat mielde sotnabeaivve Lappi Ruonáid euroválgakampánnjá rahpamis Roavvenjárggas. Dilálašvuohta lágiduvvo dmu 14 rájes Cafe Bar 21:s.